Юртимизда тазйиқ ва зўравонликдан жабр кўрган шахсларга психологик, тиббий ва ҳуқуқий ёрдам кўрсатиш марказлари йўлга қўйилган. Хўш, бугун ушбу марказларга асосан қандай инсонлар мурожаат қиляпти ва уларга қандай ёрдам кўрсатиляпти?

Мазкур саволга Мирзо Улуғбек тумани “Инсон” ижтимоий хизматлар маркази психологи Шаҳноза Жумақулова жавоб берди.

—Ҳар куни камида  6-7 нафар фуқаро марказимизга келиб мурожаат қилади. Ҳозирги кунда бизга мурожаатлар кўпайган. Илгари одамлар марказимиз фаолияти ҳақида маълумотга эга эмас эди. Мурожаатлар кўпайганининг нимаси яхши? Бу, одамлар ўз устида ишлаётгани, ҳақ-ҳуқуқини билишга, ўзини ривожлантиришга ҳаракат қилаётганидан далолат.

Зўравонликка учраган одам бизга мурожаат қилгач, энг аввало, унинг руҳий ҳолати билан ишлаймиз. Биз кўпроқ инсоннинг характерини ўрганамиз. Тазйиқ ўтказадиган агрессор одам қурбонга айланган одамнинг характерини яхши ўрганиб, уни янаям эзишга ҳаракат қилади.  

Шу боис, жабр кўрган инсонни комиллик босқичига олиб чиқишга ҳаракат қиламиз. Комил инсон босқичига чиққач, ўзини-ўзи ҳимоя қилишни, атрофидагилар билан қандай муносабатга киришишни билади. Унинг қандай ҳақ-ҳуқуқлари борлигини тушунтириб, яна қурбон бўлмаслик йўлларини ўргатамиз.

Н.Раҳмонова, А.Содиқов (видео), У.Тўхтаев (монтаж), ЎзА