“Ғалаба боғида” “Иккинчи жаҳон уруши қатнашчиларини ва фронт ортида фидокорона меҳнат қилганларни эъзозлаш – Ўзбекистон Республикаси ижтимоий сиёсатининг устувор йўналишларидан бири” мавзусида семинар бўлиб ўтди.

Унда сенаторлар, Қўмита ҳузуридаги экспертлар, Ўзбекистон Республикаси Мудофаа вазирлиги, Ички ишлар, Фавқулодда вазиятлар вазирлиги Академиялари, Божхона институти, Жамоат хавфсизлиги университети курсантлари, Ўзбекистон Миллий университети ва Тошкент давлат педагогика университети талабалари, шунингдек, оммавий ахборот воситалари вакиллари иштирок этди.

Семинарда Иккинчи жаҳон уруши қатнашчилари ва фронт ортида фидокорона меҳнат қилган фахрийларимизнинг қаҳрамонлиги ва тарихий хизматларини яна бир бор кенг жамоатчилигимизга етказишга, ёш авлодни ота-боболаримиз жасоратига муносиб бўлган, бугунги тинч, осойишта ҳаётни асраб-авайлаш ва янада мустаҳкамлашга қодир, жонажон Ватанимизга садоқатли инсонлар этиб тарбиялашга эътибор қаратилди.

Таъкидланганидек, Иккинчи жаҳон уруши ҳақиқатан ҳам инсоният тарихидаги энг даҳшатли, энг қонли қирғин бўлган. Бу уруш инсоният, шу жумладан, халқимиз бошига қандай оғир азоб-уқубат ва талафотлар, беҳисоб қурбонлар келтирганини эл-юртимиз ҳеч қачон унутмайди.

Албатта, бу борада республикамизда давлат раҳбари бошчилигида зарур ишлар олиб борилмоқда.

Президент Ш.М.Мирзиёев ташаббуслари билан Иккинчи жаҳон уруши йилларидаги тарихимизни ўрганишда том маънода янги давр бошланди. Хусусан, 2020 йилга қадар уруш бошланган пайтда юртимиз аҳолиси 6 млн 551 минг кишини ташкил этган ва уларнинг 1,5 млнга яқини урушда иштирок этган, деб ҳисобланар эди.

Жаҳон архивлари ўрганилиб, янги топилган маълумотлар таҳлил қилинганда эса Ўзбекистондан 1,951 млнга яқин киши урушга сафарбар этилгани маълум бўлди. Бундан ташқари, илгари 396 минг нафар Ўзбекистон фуқароси урушда ҳалок бўлган, деб айтилган бўлса, аслида бу рақам 538 мингдан зиёд бўлган, 158 мингдан кўпроғи бедарак йўқолган.

Олиб борилган илмий изланишлар натижасида орден ва медаллар билан мукофотланган Ўзбекистон вакилларининг сонига ҳам ойдинлик киритилди. Илгари бу кўрсаткич 120 минг деб қайд этилар эди. Янги маълумотларга асосан Иккинчи жаҳон урушида 200 мингдан зиёд аскар ва офицерларимиз жанговар давлат мукофотлари билан тақдирлангани аниқланди. Жумладан, илгари 280 нафар деб ҳисоблаб келинган ўзбекистонлик Совет Иттифоқи қаҳрамонларининг сони 301 та экани, 70 нафар юртдошларимиз учала даражадаги “Слава” орденига сазовор бўлгани ўз тасдиғини топди ва тарихий ҳақиқат юзага чиқди.

Ўзбекистон парламенти делегацияси яқинда бўлиб ўтган МДҲ Парламентлараро ассамблеясининг Иккинчи жаҳон урушидаги Ғалабанинг 80 йиллигига бағишланган мажлисида ҳам иштирок этган эди. Тадбир давомида уруш йилларида Ўзбекистон халқининг фронтда ва фронт ортида кўрсатган беқиёс жасорати ва меҳнати алоҳида эътироф этилди. Ўзбекистон делегациясининг мазкур мажлисдаги иштироки мамлакатимизда Иккинчи жаҳон уруши фахрийларини қадрлаш, тарихий хотирани сақлаш ва ёш авлодни ватанпарварлик руҳида тарбиялашга қаратилган сиёсатнинг халқаро даражадаги ифодаси бўлди.

Ўзбекистон уруш майдонларига жуда катта миқдорда ҳарбий техника, қурол-яроғ, дори-дармон, кийим-кечак, озиқ-овқат маҳсулотлари етказиб берадиган муҳим таянч марказларидан бирига айланган эди. Ишлаб чиқариш корхоналари ҳарбий мақсадларда қайта ташкил этилди. Жумладан, кўп миллатли аҳолимизнинг фидокорона меҳнати билан ўша вақтдаги 300 га яқин ишлаб чиқариш корхоналарида ҳарбий маҳсулотлар ишлаб чиқарилди. Шу даврда фронт ҳудудларидан юртимизга 151 та завод кўчириб келтирилиб, қисқа фурсатда ишга туширилган.

Шунингдек, сўзга чиққанлар Ўзбекистон уруш туфайли уй-жойи, ота-онаси ва қариндошларидан ажралган қарийб 1,5 млн кишини ўз яқинларидек қабул қилганини алоҳида таъкидлади.

Тадбир давомида 2025 йил 20 февралда Президентимиз томонидан қабул қилинган “Иккинчи жаҳон урушидаги ғалабанинг 80 йиллиги ҳамда Хотира ва қадрлаш кунига тайёргарлик кўриш ва уни муносиб нишонлаш тўғрисида”ги қарорида кўзда тутилган масалаларнинг мазмун-моҳиятига эътибор қаратилиб, уруш йиллари бедарак йўқолган 158 мингдан ортиқ кишиларни қидириш, уларнинг тақдирига аниқлик киритиш ишларида эришилган натижаларга тўхталиб ўтилди.

Семинар сўнггида бу борада келгусида амалга оширилиши лозим бўлган ишлар юзасидан таклифлар билдирилди.

Ўзбекистон Республикаси
Олий Мажлиси Сенати