Joriy yilning 22-24-fevral kunlari Birlashgan Millatlar Tashkilotining Iqtisodiy, ijtimoiy va madaniy huquqlar boʻyicha qoʻmitasi 71-sessiyasi doirasida Oʻzbekiston Respublikasining 3-davriy milliy maʼruzasi koʻrib chiqildi. 

Mazkur sessiyada Oʻzbekiston delegatsiyasining tarkibida ishtirok etgan Korrupsiyaga qarshi kurashish agentligi direktori Akmal Burxanov, mamlakatda korrupsiyaga qarshi kurashish siyosati, korrupsiyaga qarshi kurashish boʻyicha xalqaro standartlarning Oʻzbekiston qonunchiligiga implementatsiya jarayonlari va boshqa amalga oshirilayotgan islohotlar haqida maʼlumot berib oʻtdi. 

Maʼlumot uchun: Oʻzbekiston Respublikasi Uchinchi davriy maʼruzani  2019-yil 19-iyunda Qoʻmitaga taqdim qilgan. Mazkur Milliy maʼruzani tayyorlashda 30 ga yaqin davlat organlari va 10 ta nodavlat notijorat tashkilotlar ishtirok etgan.

Xususan, Agentlik faoliyati, soʻnggi yillarda koʻrilayotgan preventiv chora-tadbirlar, davlat xizmatchilarining odob-axloq qoidalari, fuqarolarning va davlat xizmatchilarining korrupsiyaga qarshi kurashish boʻyicha oʻqitish, jismoniy va yuridik shaxslarning korrupsiya toʻgʻrisida Agentlikka xabar beruvchi tizim yuzasidan axborot berildi.

Sessiyada ekspertlarga sogʻliqni saqlash sohasida ham korrupsiyaga qarshi amalga oshirilayotgan chora-tadbirlar, xususan, «Korrupsiyasiz soha» loyihasi va uning natijalari yuzasidan batafsil maʼlumot taqdim etildi.

Korrupsiyaga qarshi kurashish agentligi 
Axborot xizmati