21 oktyabr kuni Inson huquqlari bo‘yicha O‘zbekiston Respublikasi Milliy markazi direktori o‘rinbosari Dilnoza Muratova AQSh Xalqaro rivojlanish agentligi – USAIDning “Sud organlarini mustahkamlash bo‘yicha dastur” loyihasi rahbari Sonya Prostran bilan uchrashdi.

Uchrashuv doirasida “Sud organlarini mustahkamlash bo‘yicha dastur” loyihasi taqdimoti o‘tkazildi. Shuningdek, o‘zaro hamkorlikning istiqbollari muhokama qilindi.

Sonya Prostran “Sud organlarini mustahkamlash bo‘yicha dastur” loyihasining uchta tarkibiy qismi haqida atroflicha so‘zlab berdi. Xususan, loyihadan sud tizimini kuchaytirish, sudyalarning va ularni o‘qitadigan muassasalarning salohiyatini oshirish hamda sud tizimiga nisbatan jamoatchilik ishonchini yuksaltirish bilan bog‘liq chora-tadbirlar o‘rin olgan.

Mazkur loyihani Oliy sud, Sudyalar oliy maktabi, Sudyalar oliy kengashi va Milliy markaz bilan hamkorlikda amalga oshirish mo‘ljallanmoqda.

Inson huquqlari bo‘yicha
O‘zbekiston Respublikasi
Milliy markazining
matbuot xizmati