25 iyun kuni Jizzax shahrida shu mavzuda xalqaro, fanlararo ilmiy-amaliy konferentsiya bo'lib o'tdi. Anjuman “Sharof Rashidov ilmiy-ma'rifiy memorial uy-muzeyi” nodavlat notijorat tashkiloti tomonidan O'zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo'llab-quvvatlash jamoat fondi mablag'larini boshqarish bo'yicha Parlament komissiyasi ko'magida tashkil etildi.

Onlayn va oflayn tarzda o'tkazilgan xalqaro ilmiy-amaliy konferentsiya ishtirokchilarini akademik Akmal Saidov qutladi va anjuman ishiga muvaffaqiyatlar tiladi.

Ushbu ilmiy-amaliy konferentsiyani o'tkazishdan maqsad – atoqli davlat arbobi, yozuvchi Sharof Rashidov ma'naviy merosini uning faoliyati bilan bog'liq holda, dolzarb uslubiy yondashuvlar, teran tahlil va talqinlar negizida har tomonlama ilmiy mushohada ko'zgusidan o'tkazish hamda mamlakatimiz ijtimoiy-iqtisodiy va madaniy hayotida bu borada xolis yondashuvni shakllantirishdan iborat.

Shuningdek, O'zbekiston tarixining 1950-1980-yillarni qamragan davri haqida yangicha tadqiqotlarning yo'nalish va shakllari bo'yicha izlanishlar olib borish hamda ayni mavzudagi bilimlarni ommalashtirish masalalari ko'zda tutilgan.

Inson huquqlari bo'yicha
O'zbekiston Respublikasi
Milliy markazining
matbuot xizmati