25 июнь куни Жиззах шаҳрида шу мавзуда халқаро, фанлараро илмий-амалий конференция бўлиб ўтди. Анжуман “Шароф Рашидов илмий-маърифий мемориал уй-музейи” нодавлат нотижорат ташкилоти томонидан Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси кўмагида ташкил этилди.

Онлайн ва офлайн тарзда ўтказилган халқаро илмий-амалий конференция иштирокчиларини академик Акмал Саидов қутлади ва анжуман ишига муваффақиятлар тилади.

Ушбу илмий-амалий конференцияни ўтказишдан мақсад – атоқли давлат арбоби, ёзувчи Шароф Рашидов маънавий меросини унинг фаолияти билан боғлиқ ҳолда, долзарб услубий ёндашувлар, теран таҳлил ва талқинлар негизида ҳар томонлама илмий мушоҳада кўзгусидан ўтказиш ҳамда мамлакатимиз ижтимоий-иқтисодий ва маданий ҳаётида бу борада холис ёндашувни шакллантиришдан иборат.

Шунингдек, Ўзбекистон тарихининг 1950-1980-йилларни қамраган даври ҳақида янгича тадқиқотларнинг йўналиш ва шакллари бўйича изланишлар олиб бориш ҳамда айни мавзудаги билимларни оммалаштириш масалалари кўзда тутилган.

Инсон ҳуқуқлари бўйича
Ўзбекистон Республикаси
Миллий марказининг
матбуот хизмати