Сенатда Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди.

Сенат Раиси, Халқаро рейтинг ва индекслар билан ишлаш бўйича республика кенгаши раиси Танзила Норбоева олиб борган йиғилишда мамлакатимизда олиб борилган ислоҳотлар натижасида қатор халқаро рейтинг ва индексларда Ўзбекистоннинг ўрни яхшилангани таъкидланди.

Хусусан, жорий йилнинг ўтган даврида “S&P”, “Fitch” ва “Moodyʼs” халқаро рейтинг агентликлари томонидан Ўзбекистоннинг суверен кредит рейтинг кутилмаси илк бор “барқарор”дан “ижобий”га оширилди. 

Иқтисодий эркинлик индексида Ўзбекистон 9 поғонага кўтарилиб, 184 мамлакат орасида 100-ўринни эгаллаган бўлса, Барқарор ривожланиш мақсадлари индексида 19 поғонага юқорилаб, 167 давлат орасида 62-ўринни эгаллади.

Глобал инновация индексида Ўзбекистон ўз кўрсаткичларини 4 поғонага яхшилаб, 139 давлат орасида 79-ўринга кўтарилди ва Марказий Осиёда биринчи ўринга чиқди.

Мажлисда ислоҳотлардан келиб чиқиб, янги устувор халқаро рейтинглар билан ишлаш ҳақида сўз борди. Жумладан, Саёҳат ва туризмни ривожлантириш индекси, Глобал гендер тафовути индекси ҳамда Ижтимоий тараққиёт индексидаги Ўзбекистоннинг ўрни муҳокама қилиниб, уларни мамлакатимиз учун устувор этиб белгилаш таклифи илгари сурилди.

Ҳудудларнинг ҳуқуқ устуворлиги индексининг 2024 йил натижалари муҳокама қилинди. Индекс натижаларига кўра, энг юқори кўрсаткич Фарғона вилоятида (79 балл), энг қуйи кўрсаткич Тошкент вилоятида (63,1 балл) қайд этилган. Йўналишлар кесимида эса “Фуқаролар ҳуқуқ ва эркинликларининг таъминланиши” (-3 балл) ва “Одил судлов ва суд қарорларининг ижро этилиши” (-2 балл) индикаторларида натижалар пасайган.

Йиғилишда 2025 йил учун Ўзбекистоннинг устувор халқаро рейтинг ва индекслардаги ўрнини яхшилашга қаратилган амалий чора-тадбирлар дастурларининг биринчи ярим йилликдаги ижро ҳолати кўриб чиқилди.

Барқарор ривожланиш мақсадлари индексида пасайиш кузатилган, ўзгаришсиз қолган ҳамда маълумот мавжуд бўлмаган таркибий индикаторларда Ўзбекистон кўрсаткичларини яхшилаш бўйича 2025-2026 йилларга мўлжалланган чора-тадбирлар режаси (“йўл харитаси”) лойиҳаси муҳокама қилинди. 

Йиғилишда кўриб чиқилган масалалар юзасидан республика кенгашининг тегишли қарори қабул қилинди.

Н.Абдураимова, ЎзА