ЕХҲТнинг Миллий озчиликлар бўйича Олий комиссари Кристоф Камп ўз нутқида Инсон ҳуқуқлари тўғрисидаги халқаро пактларнинг 60 йиллиги ҳамда Ривожланиш ҳуқуқи тўғрисидаги декларациянинг 40 йиллиги доирасида миллий озчиликлар ҳуқуқларини ҳимоя қилишнинг аҳамиятига алоҳида урғу берди.
У тенглик, инсон ҳуқуқларининг бўлинмаслиги ва инклюзив ривожланишнинг ўзаро боғлиқлигига эътибор қаратиб, маданий ва лисоний ўзликни ҳимоя қилиш билан бир қаторда таълим олиш, бандлик, соғлиқни сақлаш ҳамда ижтимоий ва иқтисодий ҳаётда иштирок этиш учун тенг имкониятлар таъминланиши зарурлигини таъкидлади.
Кристоф Кампнинг қайд этишича, айрим гуруҳларнинг ривожланиш жараёнларидан четда қолиши ижтимоий кескинлик манбаига айланиши мумкин. Ҳолбуки, жамиятнинг барча қатламлари иштирокини ва эришилган натижаларнинг адолатли тақсимланишини кўзда тутувчи инклюзив тараққиёт низоларнинг олдини олишда муҳим омил ҳисобланади.
Шунингдек, тиллар, маданиятлар ва жамоалар хилма-хиллиги тарихан шаклланган минтақа сифатида Марказий Осиёнинг ўрни ҳамда ушбу соҳадаги давлатлараро ҳамкорликнинг аҳамияти алоҳида эътироф этилди.
Нутқда кўп тилли ва кўп маданиятли таълим масаласи муҳим ўрин эгаллади. Олий комиссар ЕХҲТнинг ушбу йўналишда Марказий Осиё давлатлари билан олиб бораётган кўп йиллик фаолиятини қайд этар экан, давлат тили билан бир вақтда она тилини ўрганиш имконияти турли жамоалар вакилларининг ижтимоий ва иқтисодий ҳаётда тўлақонли иштирок этишига хизмат қилишини таъкидлади.
Унинг фикрича, «Тенглик бир хиллик дегани эмас: жамият ўзидаги озчилик жамоаларини ҳимоя қилса ва уларни ўз ҳаётига жалб этса, янада кучлироқ бўлади».
Инсон ҳуқуқлари бўйича
Ўзбекистон Республикаси
Миллий марказининг
матбуот хизмати