Инчон шаҳрида «Ўзбекистон-Жанубий Корея: ҳамкорликка 30 йил» мавзусига бағишланган фотокўргазма ташкил этилди

СЕУЛ, 19 апрель. /«Дунё» АА/. Ўзбекистон билан Корея Республикаси ўртасида дипломатия муносабатлари ўрнатилганининг 30 йиллига бағишланган тадбирлар доирасида жорий йил 5 - 15 апрель кунлари Инчон шаҳрида «Ўзбекистон-Жанубий Корея: ҳамкорликка 30 йил» мавзусига бағишланган фотокўргазма ташкил этилди, деб хабар бермоқда «Дунё» АА мухбири. Ушбу тадбир Жанубий Корея-Ўзбекистон бизнес ассоциацияси билан ўзаро ҳамкорликда ўтказилди.

Кўргазмада икки мамлакатнинг дўстона муносабатлари, мамлакатимизнинг сайёҳлик салоҳияти, шунингдек, баҳор байрами —Наврўзи олам билан боғлиқ бўлган бой анъана ва маданиятни ўзида акс эттирган қирққа яқин фотосурат намойиш этилди.

Унда профессионал сурат усталарининг ишлари билан бир қаторда ўзбекистонлик ҳаваскор фотосуратчиларнинг асарлари ҳам тақдим этилди.

Бундан ташқари, фотокўргазма доирасида ҳунармандчилик, зардўзлик, ёғоч ўймакорлиги, ипак маҳсулотлари ва сопол буюмлар ҳамда халқ амалий санъатининг  бошқа намуналари ҳам намойиш этилди.

Фотокўргазма меҳмонлари ушбу тадбирнинг Корея Республикаси аҳолисига Ўзбекистондаги бой маданий мерос, уунинг бағридаги тарихий обидалар, миллий байрамларининг ёрқин ранглари билан яқиндан танишиш имконини берганини қайд этдилар.

Ўн кун давом этган ушбу кўргазма иши билан минг нафардан ортиқ ўзбек маданияти ихлосмандлари - корейс ва бошқа миллатлар вакиллари, ушбу мамлакатда таҳсил олаётган ва меҳнат фаолиятини олиб бораётган ватандошларимиз танишдилар.

Кўргазмага келган айрим меҳмонлар тадбирдан орттирган таассуротларини “Дунё” АА мухбири билан ўртоқлашдилар.

Сонг Де Ҳе, тадбиркор, кўргазма иштирокчиси:

- Мен Жанубий Корея ва Ўзбекистон ўртасида дипломатия муносабатлари ўрнатилганининг 30 йиллиги билан ҳар икки мамлакат халқларини чин қалбимдан табриклайман. Ўтган йил декабрь ойида Ўзбекистон Президентининг Жанубий Кореяга давлат ташрифи амалга оширилган эди. Ушбу олий даражадаги ташриф икки мамлакат алоқаларини янада чуқурлаштиришга хизмат қилади.  

Корея Республикаси ва Ўзбекистон тадбиркорлари ўртасидаги муносабатларнинг янада фаоллашиб бораётгани қувонарли ҳолдир. Мен бугун Инчон шаҳрида бўлиб ўтаётган кўргазмага келиб, Ўзбекистонннинг бой маданияти ва санъати, тарихий обидаларини ўзида акс эттирган суратларни томоша қилар эканман, беҳад  завқланганимни айтишни истар эдим. Ўйлайманки, бу каби кўргазмалар икки мамлакатнинг дўстона алоқалари янада чуқурлашишига салмоқли ҳисса қўшади.

Ку Мин Ёнг, тадбир иштирокчиси:

- Кўргазмада намойиш этилаётган асарлар нафақат икки мамлакат ўртасидаги алоқалар ҳақида, балки Ўзбекистоннинг иқтисодиёти, илм-фани, санъати ва маданиятни ҳам ўзида акс эттирган. Кўргазма иши билан танишар эканман, Ўзбекистон ҳақида янада кўпроқ маълумот олиш имкониятига эга бўлганимни таъкидлашни истар эдим.

Айни пайтда мен ўзбек тилини ўрганаяпман. Келажакда ўзбек тилини мукаммал ўрганиб, Ўзбекистоннинг машҳур тарихий  шаҳарларига саёҳат қилишни режалаштирганман.

«Халқ сўзи» газетасининг 2022 йил 21 апрель