ТОШКЕНТ, 13 октябрь. /«Дунё» АА/.  Олий Мажлис Қонунчилик палатаси Спикерининг биринчи ўринбосари Акмал Саидов бошчилигидаги Ўзбекистон парламенти делегацияси Руанда пойтахти - Кигали шаҳрида ўтказилаётган  Парламентлараро Иттифоқ (ПИ) Ассамблеясининг 145-сессиясида иштирок этаётир, деб хабар бермоқда «Дунё» АА мухбири.

Парламент қуйи палатаси маълумотига кўра, Ассамблеяда 110  давлатдан мингдан ортиқ миллий парламент аъзолари, 45 нафар парламент спикери қатнашмоқда. Сессиянинг тантанали очилиш маросимида Руанда Президенти Паул Кагаме иштирок этиб, тадбир қатнашчиларини қутлади.

Кун тартибида тинчлик ва барқарорликни мустаҳкамлашдаги ҳаракатланувчи куч сифатида гендер тенглиги ва гендер масалаларини инобатга оладиган парламентларнинг ролини янада ошириш мавзуси билан бир қаторда бугун дунёда вужудга келган сиёсий, иқтисодий-ижтимоий ва экологик муаммоларга бағишланган муҳокаманинг ўтказилиши режалаштирилган.

Шунингдек, Ассамблея якунида ПИнинг «Демократия ва инсон хуқуқларини ҳимоя қилиш» бюроси томонидан таклиф этилаётган «Халқаро миграция даражаси юқори бўлган мамлакатларнинг маҳаллий ва минтақавий ривожланишига парламентнинг таъсири ҳамда одам савдоси ва инсон ҳуқуқлари бузилишининг барча шаклларига, жумладан, давлат томонидан қўллаб-қувватланишига чек қўйиш» мавзусида резолюция қабул қилиниши кутилмоқда.

Маълумот учун: Парламентлараро Иттифоқ 1889 йилда ташкил этилган. Ҳозирги пайтда унга 179 та мамлакат парламенти аъзо. Ўзбекистон 2017 йил октябрь ойида Парламентлараро Иттифоққа аъзолигини тиклаган. Ўзбекистон Олий Мажлиси Қонучилик палатаси Спикерининг биринчи ўринбосари Акмал Саидов 2020 йилдан буён Парламентлараро Иттифоқнинг вице-президенти ҳисобланади.