Ўзбекистон Республикаси санитария-эпидемиологик осойишталик ва жамоат саломатлиги хизмати ҳамда ОИВ инфекцияси, сил ва безгак касалликларининг тарқалишига қарши курашиш соҳасида халқаро ва хорижий ташкилотлар билан яқин ҳамкорликни  мувофиқлаштиришни таъминлаш ҳамда чора-тадбирларни амалга ошириш учун донор маблағларини жалб қилиш бўйича идоралараро эксперт кенгаши котибияти томонидан 2021 йил 11–13 ноябрь кунлари семинар ўтказилди.

Тадбир Идоралараро эксперт кенгаши аъзолари билан давлат, халқаро, жамоатчилик ва нодавлат ташкилотлари ўртасидаги ҳамкорликни мустаҳкамлаш масалаларига бағишланди.

Ушбу семинарда Инсон ҳуқуқлари бўйича Ўзбекистон Республикаси Миллий маркази ходими ҳам иштирок этди.

Семинарнинг асосий мақсади – ОИВ инфекцияси ва сил касаллиги тарқалишига қарши кураш бўйича чора-тадбирларни амалга оширишда тармоқлараро ёндашув бўйича ҳамкорликни мустаҳкамлаш ва ривожлантиришдан иборат.

Шу билан бирга, Идоралараро эксперт кенгаши аъзоларининг ОИВ инфекцияси ва сил касаллиги тарқалишига қарши курашишда тармоқлараро ҳамкорликнинг долзарб масалалари бўйича хабардорлигини ошириш кўзда тутилди.

Идоралараро эксперт кенгаши семинарида иштирокчиларга:

• касалликларнинг эпидемиологик ҳолати;
• ОИВ инфекцияси ва сил касаллиги тарқалишига қарши кураш дастурларини давлат томонидан мувофиқлаштиришнинг мавжуд механизмлари;
• давлат, халқаро ва жамоат ташкилотларининг тармоқлараро ёндашувининг долзарб масалалари;
• ушбу касалликларга қарши курашиш ва олдини олиш дастурларида нодавлат ва нотижорат ташкилотлар, Глобал фонд ва бошқа донорлар грантларини амалга оширишда иштирок этиш масалалари бўйича маълумотлар тақдим этилди.

Шунингдек, семинар якунлари бўйича Ўзбекистон Республикасида ОИВ ва сил касаллигининг тарқалишига қарши кураш бўйича идоралараро ҳамкорликнинг ҳаракат режалари ишлаб чиқилди.

Ойдин Иброҳимова