Жорий йил 14 апрель куни Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди.

Уни Олий Мажлис Сенати Раиси, Халқаро рейтинг ва индекслар билан ишлаш бўйича республика кенгаши раиси Танзила Нарбаева олиб борди.

Йиғилишда Кенгаш аъзолари, вазирлик ва идоралар мутасаддилари, нодавлат нотижорат ташкилотлари ҳамда ОАВ вакиллари иштирок этди.

Қайд этилганидек, 2021 йил давомида эълон қилинган мамлакатимиз учун устувор бўлган жами 19 та халқаро рейтингда Ўзбекистоннинг ўрни акс этиб, 11 тасида мамлакатимиз позицияси яхшиланди.

Хусусан, Суверен кредит рейтингларида ижобий тенденциялар кузатилиб, “Эс энд Пи” («S&P») халқаро рейтинг агентлиги мамлакатимиз кредит рейтингини “салбий”дан “барқарор”га, “Мудис” (Moody’s) агентлиги эса “барқарор”дан “ижобий”га ўзгартирди.

Глобал инновациялар индексида Ўзбекистон 2021 йилда 7 поғонага кўтарилиб, 132 та давлат орасида 86-ўринни эгаллади ва энг тез юқорилаган мамлакатлар топ 10 талигига кирди.

“Transparency International” халқаро ташкилотининг 2021 йил учун Коррупцияни қабул қилиш индексида мамлакатимиз ўз ўрнини 6 поғона яхшилаб, 180 та давлат ичида 140-ўринни эгаллади ва сўнгги беш йилда 17 поғона юқорилади. Ташкилот ҳисоботида Ўзбекистон Марказий Осиёда ўрнак бўлаётганлиги ва сўнгги 5 йилда энг барқарор ўсиш кўрсаткичига эришган жаҳондаги 6 та давлатдан бирига айлангани алоҳида таъкидланган.

Тадбирда ижтимоий-иқтисодий ҳамда сиёсий-ҳуқуқий соҳаларига оид устувор халқаро рейтинг ва индекслардаги мамлакатимизнинг ўрнини яхшилаш бўйича 2021 йилга мўлжалланган чора-тадбирлар режасининг ижроси муҳокама қилинди.

Хусусан, ўтган йил давомида режага мувофиқ 43 та қонун, 3 та янги таҳрирдаги Кодекс, Президентнинг 24 та фармони ва қарори, Ҳукуматнинг 44 та қарори лойиҳалари ишлаб чиқилиб, шундан 16 та қонун, Президентнинг 16 та фармони ва қарори, Вазирлар Маҳкамасининг 27 та қарори қабул қилинди.

Йиғилишда режа ижросига масъулиятсизлик билан ёндашган вазирлик ва идораларнинг фаолияти танқид қилинди.

Тадбирда мутасадди вазирлик ва идораларнинг ахборотлари эшитилиб, ҳудудларда халқаро рейтинглар билан ишлаш ҳолати, мавжуд муаммо ва камчиликлар, фойдаланилмаган имкониятлар ҳамда айрим халқаро рейтингларни, шу жумладан Буюк Британиянинг “Oxford Insights” консалтинг компанияси ва Канаданинг Халқаро тадқиқотларни ривожлантириш институти томонидан юритиладиган “Ҳукуматнинг сунъий интеллектга тайёргарлик индекси”ни Ўзбекистон учун устувор сифатида белгилаш масаласи муҳокама этилди.

Шунингдек, тадбирда мамлакатимизнинг ижтимоий-иқтисодий ва сиёсий-ҳуқуқий соҳага оид устувор халқаро рейтинг ва индекслардаги ўрнини яхшилаш бўйича 2022 йилга мўлжалланган ташкилий чора-тадбирлар режаси тасдиқланиб, йил давомида 1 та стратегия, 5 та кодекс, 9 та қонун, 2 та концепция ва 35 та норматив-ҳуқуқий ҳужжат лойиҳаларини ишлаб чиқиш кўзда тутилмоқда.

Хусусан, давлат компанияларининг инвестиция лойиҳаларини молиялаштиришда давлат кафолатини беришни босқичма-босқич камайтириш, парламентдаги “Ҳукумат соати” институти ва депутатликка номзод кўрсатиш тартибини такомиллаштириш, монопол корхоналар томонидан ишлаб чиқилаётган маҳсулотлар таннархи тўғрисидаги маълумотларни эълон қилиб бориш тизимини жорий қилиш каби 300 дан ортиқ вазифани бажариш режалаштирилмоқда.

Йиғилиш якунида Республика кенгашининг тегишли қарори қабул қилинди.