2022 йил 13 май куни Олий Мажлис Қонунчилик палатаси Спикерининг биринчи ўринбосари Акмал Саидов мамлакатимизга ташриф буюрган Малайзиянинг Коррупцияга қарши курашиш комиссияси бош комиссари Датук Сери Азам бин Баки бошчилигидаги делегацияси аъзолари билан учрашди.

Мулоқот аввалида А.Саидов кейинги йилларда Ўзбекистонда коррупцияга қарши курашиш сиёсати ва унинг асосий йўналишлари, соҳада амалга оширилаётган ислоҳотлар, ушбу жараёнларда Коррупцияга қарши курашиш Миллий кенгашининг иштироки хусусида батафсил ахборот берди.

Делегация аъзоларига Президентимизнинг таклифи асосида 2019 йилда Олий Мажлис Қонунчилик палатасида Коррупцияга қарши курашиш ва суд-ҳуқуқ масалалари қўмитаси ташкил этилгани, бугунги кунда қўмита коррупцияга қарши курашиш борасида парламентнинг асосий вазифа ва функцияларидан келиб чиқиб 5 та йўналишда иш олиб бораётгани ҳақида маълумот берилди. Шунингдек, мамлакатимиз парламентининг қонунчилик фаолияти, норма ижодкорлиги, қўмита ва фракциялари иш услублари ҳамда парламентаризм соҳасидаги янгиликлар ҳақида сўзлаб берилди.

Ўз навбатида, малайзиялик делегация вакиллари Ўзбекистонда олиб борилаётган кенг кўламли ислоҳотлар ўзининг ижобий самарасини бераётганини эътироф этиб, ўз мамлакатларида бу борадаги тажриба ва амалиёт, хусусан, коррупцияга қарши курашиш механизмлари, соҳада фуқаролик жамияти институтлари билан ҳамкорликни йўлга қўйиш, жамоатчилик назоратини олиб бориш масалалари юзасидан маълумот бериб ўтди.

Суҳбат давомида томонлар коррупцияга қарши курашиш тузилмалари фаолиятини такомиллаштириш, коррупцияга қарши курашиш бўйича халқаро стандартларни жорий қилиш ва халқаро ҳамкорликни кучайтиришнинг бугунги кундаги зарурати юзасидан ўзаро фикр алмашишди.

Самимий ва конструктив руҳда ўтган учрашувда яқин истиқболда аниқ соҳа ва йўналишлар бўйича икки давлат вакиллари учун манфаатли ва аҳамиятли лойиҳаларни амалга ошириш, ҳамкорлик алоқаларини янада мустаҳкамлаш бўйича бир қатор келишувларга эришилди.

Ўзбекистон Республикаси Олий Мажлиси Қонунчилик палатаси расмий сайти