2022 йил 11 октябрь куни Руанда Республикасининг пойтахти Кигали шахрида Парламентлараро Иттифоқ (ПИ) Ассамблеясининг 145-сессияси ўз ишини бошлади.

Унда Олий Мажлис Қонунчилик палатаси Спикерининг биринчи ўринбосари А. Саидов бошчилигидаги Ўзбекистон парламенти делегацияси иштирок этмоқда.

Ассамблеяда 110 та давлатдан мингдан ортиқ миллий парламент аъзолари, 45 нафар парламент Спикери қатнашмоқда. Сессиянинг тантанали очилиш маросимида Руанда Республикаси Президенти Паул Кагаме иштирок этиб, тадбир қатнашчиларини қутлади.

Кун тартибида тинчлик ва барқарорликни мустаҳкамлашдаги ҳаракатланувчи куч сифатида гендер тенглиги ва гендер масалаларини инобатга оладиган парламентларнинг ролини янада ошириш мавзуси билан бир қаторда бугун дунёда вужудга келган сиёсий, иқтисодий-ижтимоий ва экологик муаммолар хусусида муҳокама ўтказилиши режалаштирилган.

Шунингдек, Ассамблея якунида ПИнинг “Демократия ва инсон хуқуқларини ҳимоя қилиш” бюроси томонидан таклиф этилаётган “Халқаро миграция даражаси юқори бўлган мамлакатларнинг маҳаллий ва минтақавий ривожланишига парламентнинг таъсири ҳамда одам савдоси ва инсон ҳуқуқлари бузилишининг барча шаклларига, жумладан, давлат томонидан қўллаб-қувватланишига чек қўйиш” мавзусида резолюция қабул қилиниши кутилмоқда.

Маълумот учун: Парламентлараро Иттифоқ 1889 йилда ташкил этилган. Ҳозирги вақтда унга 179 та мамлакат парламенти аъзо. Ўзбекистон 2017 йил октябрь ойида Парламентлараро Иттифоққа аъзолигини тиклаган. Ўзбекистон Республикаси Олий Мажлиси Қонучилик палатаси Спикерининг биринчи ўринбосари А.Саидов 2020 йилдан буён Парламентлараро Иттифоқнинг Вице-президенти ҳисобланади. Олий Мажлис Қонунчилик палатасининг икки нафар депутати — Н.Тилаволдиев ва М. Баратовалар ПИнинг тегишли қўмита аъзоларидир.

 Ўзбекистон Республикаси Олий Мажлиси Қонунчилик палатаси расмий сайти