Ўзбекистон Республикаси Олий Мажлиси Қонунчилик палатаси Спикерининг биринчи ўринбосари Акмал Саидов Парламентлараро Иттифоқ томонидан ташкил этилган “Парламентда жамоатчилик муҳокамаларининг ўрни: Энг чекка ҳудудлардаги жамоатчиликкача етиб бориш” мавзусига бағишланган вебинарда иштирок этди. 

Тадбирдан кўзланган мақсад — Парламентлараро Иттифоққа аъзо мамлакатлар парламент аъзолари ўз мамлакатларида чекка ҳудудлардаги аҳоли ва жамоатчилик билан ишлаш ҳамда парламентда қабул қилинаётган қонунларнинг мазмун-моҳиятини аҳолига етказиш бўйича йўлга қўйилган услуб, тажрибалар билан ўртоқлашишдан иборат.

Вебинарда Сербия, Жанубий Африка ва Австралия парламентлари аъзолари ўз мамлакатларидаги парламентнинг аҳоли ва жамоатчилик билан ишлаш борасидаги тажрибалари акс эттирилган тақдимотларни намойиш этишди.

Жумладан, Жанубий Африка Республикаси парламенти депутати маълумот беришича, мамлакатнинг энг чекка ҳудудларидаги аҳоли билан тўғридан-тўғри мулоқот ўрнатиш ҳамда аҳоли томонидан қонунчиликни такомиллаштириш бўйича таклифларни тизимли равишда қабул қилиш мақсадида жойларда парламент офислари ташкил этилган. Сербия Республикасида эса парламент қўмиталарининг йиғилишлари кенг жамоатчилик вакиллари жалб этилган ҳолда ҳудудларда ўтказилаётгани, Австралияда эса чекка ҳудудлардаги мактаб ўқувчи ва ўқитувчиларининг сиёсий билимларини оширишга қаратилган таълим дастурлари ишлаб чиқилганлиги бўйича атрофлича маълумот берилди. 

Вебинар якунида парламентарийларга кенг жамоатчилик билан ишлашда барча аҳоли қатламларини, жумладан этник камчиликларни қамраб олиш, ёшлар билан  ишлаш ва уларнинг муаммоларига алоҳида эътибор қаратиш ҳамда самарали мулоқот майдони ташкил этиш мақсадида замонавий ва рақамли технологиялардан фойдаланиш борасидаги таклиф-тавсиялар билдирилди.

Ўзбекистон Республикаси Олий Мажлиси Қонунчилик палатаси расмий сайти